Bwletin Arsylwi - Hydref 2025

Gwybodaeth o'n Harolygiadau: Themâu Allweddol mewn Practisau Meddygon Teulu

Yn dilyn ein gwaith sicrwydd yn 2024-25, gwnaethom arolygu 30 o bractisau meddygon teulu ac adrodd ar nifer o faterion ledled Cymru. Mewn rhai amgylchiadau, bu'n rhaid i ni ofyn i'r practisau gymryd camau ar unwaith i leihau'r risgiau i ddiogelwch cleifion.

🔎 Beth mae arolygiadau o bractisau meddygon teulu yn eu dweud wrthym ni

Gwybodaeth o'n Harolygiadau: Yr hyn a nodwyd gennym mewn Practisau Deintyddol 

Yn dilyn ein gweithgarwch arolygu yn 2024-25, gwnaethom adolygu nifer o bractisau deintyddol ledled Cymru a nodi sawl thema gyffredin yr oedd angen ei hystyried.

Er bod y rhan fwyaf o bractisau yn darparu gofal clinigol diogel ac effeithiol, nododd ein canfyddiadau faterion cyffredin mewn meysydd anghlinigol sy'n effeithio ar ddiogelwch cleifion, cydymffurfiaeth, a phrofiad cyffredinol cleifion.

🦷 Yr hyn a nodwyd gennym mewn Practisau Deintyddol

Adroddiad Blynyddol 2024-2025

Rydym wedi cyhoeddi ein Hadroddiad Blynyddolar gyfer 2024-2025, sy'n cynnig asesiad clir ac annibynnol o wasanaethau gofal iechyd ledled Cymru. Mae'r adroddiad yn tynnu sylw at system sydd o dan bwysau parhaus, lle mae staff ymroddedig yn dal i ddarparu gofal da o dan amodau anodd, ond lle mae'r risgiau i ddiogelwch cleifion yn parhau, a lle na chaiff gwelliannau bob amser eu cynnal.

Helpwch i Lywio Strategaeth AGIC ar gyfer 2026-2030 – Mae'r Ymgynghoriad Bellach ar Agor  

Rydym wrthi ar hyn o bryd yn datblygu ein Strategaeth ar gyfer 2026–2030. Mae'r strategaeth hon yn amlinellu ein huchelgeisiau a'n blaenoriaethau ar gyfer y pedair blynedd nesaf a sut y byddwn yn parhau i gyflawni ein cyfrifoldebau fel arolygiaeth a rheoleiddiwr annibynnol gofal iechyd yng Nghymru.

Rydym yn gwahodd gweithwyr gofal iechyd proffesiynol, sefydliadau, a'r cyhoedd o bob cwr o Gymru i gymryd rhan yn yr ymgynghoriad a helpu i lywio fersiwn derfynol y strategaeth.

Mae'r ymgynghoriad ar gael ers 8 Medi 2025 a bydd yn cau ar 1 Rhagfyr 2025

Sut i Gymryd Rhan

Cwblhewch yr arolwg ar-lein.

Lawrlwythwch gopi papur isod neu cwblhewch yr arolwg dros y ffôn: 0300 062 8163

A fyddech cystal â threulio ychydig funudau yn rhannu eich barn a'ch meddyliau? Dywedwch wrthym beth sy'n bwysig i chi.

Am ragor o wybodaeth, ewch i'n tudalen we ddynodedig.

Themâu Allweddol o'r Uwchgynhadledd Gofal Iechyd 

Mae cyfarfodydd yr Uwchgynhadledd Gofal Iechyd yn cael eu cynnal ddwywaith y flwyddyn, er mwyn rhannu gwybodaeth am ansawdd a diogelwch gwasanaethau gofal iechyd a ddarperir gan GIG Cymru.

Mae AGIC yn cydlynu ac yn gweinyddu'r Uwchgynhadledd Gofal Iechyd, ar ran y sefydliadau sy'n cymryd rhan, sy'n cynnwys Archwilio Cymru, Gweithrediaeth GIG Cymru a Llais.

Mae'r themâu allweddol a nodwyd fel meysydd sy'n peri pryder yn yr Uwchgynhadledd Gofal Iechyd yn cynnwys y canlynol:

• Mae gwasanaethau iechyd meddwl ledled Cymru yn parhau i wynebu heriau sylweddol, gan gynnwys bylchau yn y broses o gynllunio i ryddhau cleifion, dogfennaeth wael a lefel isel o gydymffurfiaeth â hyfforddiant gorfodol.
• Asesiadau niwroddatblygiadol a CAMHS – amseroedd aros hir am asesiadau, gyda rhai teuluoedd yn troi at opsiynau preifat nad ydynt wedi'u cydnabod gan y GIG.
• Heriau diwylliannol mewn rhai Byrddau Iechyd, gan gynnwys pryderon chwythu'r chwiban lle nad yw staff yn teimlo eu bod yn cael eu clywed wrth godi materion.
• Pryderon parhaus mewn perthynas â diffyg modelau cynaliadwy ar gyfer gwneud gwelliannau i'r gofal a gynlluniwyd, gan gynnwys gwaith cynllunio anghyson i ryddhau cleifion.
• Er bod buddsoddiadau sylweddol wedi'u gwneud, mae pryderon parhaus mewn perthynas â'r seilwaith ystadau sy'n heneiddio – codwyd pryderon ynghylch yr ôl-groniad o waith cynnal a chadw.
• Cyfraddau salwch uchel ymhlith staff a bylchau rota mewn gwasanaethau mamolaeth – hefyd, pryderon lle mae rhai menywod a theuluoedd yn teimlo nad ydynt yn cael eu clywed ac yn cael gofal anghyson.
• Mae dulliau digidol yn creu rhwystrau anfwriadol i grwpiau agored i niwed, gan gynnwys pobl hŷn neu unigolion niwrowahanol a all ei chael hi'n anodd defnyddio systemau sgwrsio digidol ac ymgyngoriadau o bell.
• Defnydd anghyson o'r ddyletswydd gonestrwydd a'r gwersi a ddysgwyd mewn perthynas â Rheoliad 29 – mae angen rhoi fframweithiau llywodraethu cryfach ar waith i ymgorffori'r gwersi a ddysgwyd a llywio gwelliannau.
• Mae bregusrwydd y gweithlu yn bryder parhaus sylweddol – yn arbennig o ran y broses staffio pediatreg, radioleg a meddygaeth brys.
• Mae integreiddio trawsffiniol ac ar draws sectorau yn her o hyd, gan gynnwys llwybrau anghyson ar gyfer rhai cyflyrau, a systemau cyfathrebu gwael rhwng y GIG a gofal cymdeithasol wrth ryddhau cleifion.

Gweithgarwch Sicrwydd ac Arolygu

Rydym yn arolygu gwasanaethau'r GIG ac yn rheoleiddio darparwyr gofal iechyd annibynnol yn erbyn amrywiaeth o safonau, polisïau, canllawiau a rheoliadau er mwyn nodi meysydd y mae angen eu gwella. Yn dilyn ein gwaith arolygu a sicrwydd, byddwn yn cyhoeddi adroddiad sy'n amlinellu ein canfyddiadau a'n hargymhellion. Gwyliwch sut rydym yn gwirio gwasanaethau gofal iechyd yng Nghymru drwy wylio'r fideo byr hwn.

Mae'r adroddiadau arolygu diweddaraf yn cynnwys:

Mawrth 2025 – Arolygiad ar y cyd yn nodi cryfderau trefniadau amddiffyn plant Sir Benfro a'r heriau y mae'n eu hwynebu oherwydd galw cynyddol

Ebrill 2025 – Uned Iechyd Meddwl Hafan y Coed – Canmoliaeth i ofal ond mae angen gwneud rhagor o welliannau mewn uned iechyd meddwl arbenigol yng Nghaerdydd

Ebrill 2025 – Ysbyty Gwynedd – Gofal Brys Dan Bwysau: Canmol staff er gwaethaf yr heriau parhaus yn Ysbyty Gwynedd

Mai 2025 – Ysbyty Cyffredinol Glangwili – Canmol Diwylliant Cadarnhaol a Gofal Mamolaeth Cynhwysol yn Ysbyty Glangwili, gyda Meysydd i'w Gwella wedi'u nodi

Mehefin 2025 – Ysbyty Ystrad Fawr – Canmol Canolfan Eni am ofal wedi'i deilwra at yr unigolyn ac arweinyddiaeth gref, gyda meysydd i'w gwella wedi'u nodi

Treialu Methodoleg ar gyfer Cyflenwi Practisau

Yn ystod hydref 2025, byddwn yn treialu methodoleg newydd ar gyfer Cyflenwi Practisau. Bydd hyn yn cynnwys cwblhau llyfryn cyn yr arolygiad a chynnal trafodaeth ag Adolygydd Cymheiriaid ar gyfer Meddygon Teulu yn ystod yr arolygiad. Os caiff eich practis ei ddewis i gymryd rhan yn y cynllun peilot neu i fabwysiadu'r fethodoleg newydd hon yn gynnar, byddem yn ddiolchgar pe gallech roi adborth ar y broses. Anfonwch eich adborth i agic@llyw.cymru gan nodi ‘Adborth ar Fethodoleg Cyflenwi Meddygon Teulu’ fel pwnc.

Cydbwyso Diogelwch a Phreifatrwydd: CCTV mewn Lleoliadau Iechyd Meddwl

Rydym wedi cyhoeddi datganiad polisi yn amlinellu ein safbwynt ynglŷn â'r defnydd o CCTV mewn ysbytai iechyd meddwl ac anableddau dysgu. Er y gall system CCTV gefnogi ymchwiliadau i ddigwyddiadau a diogelu cleifion a staff, mae AGIC yn pwysleisio bod angen i ddarparwyr ystyried preifatrwydd, urddas ac effeithiau moesegol yn ofalus. Mae'r polisi yn annog darparwyr i archwilio dewisiadau amgen llai ymwthiol a sicrhau y caiff unrhyw ddefnydd o system CCTV ei gyfiawnhau, ei fod yn gymesur, ac y caiff asesiad risg ei gynnal ar sail cleifion penodol.

🎥 Darllenwch y datganiad polisi llawn

Gweithio Gyda'n Gilydd er mwyn Darparu Gofal Mwy Diogel: Memoranda Cyd-ddealltwriaeth AGIC

Rydym wedi ffurfioli ein dull cydweithredol drwy gyfres o Femoranda Cyd-ddealltwriaeth â phartneriaid allweddol, gan gynnwys Llais, Coleg Brenhinol y Meddygon, Addysg a Gwella Iechyd Cymru (AaGIC), a Chomisiynydd Plant Cymru. Mae'r trefniadau hyn yn amlinellu blaenoriaethau a rennir, egwyddorion cydweithredu, a fframweithiau ar gyfer gweithio ar y cyd i atgyfnerthu'r rheoliad a gwella gwasanaethau gofal iechyd ledled Cymru.

🤝 Darllenwch bob Memoranda Cyd-ddealltwriaeth a dysgwch fwy

Rydym wrthi'n recriwtio ar gyfer sawl rôl allweddol, gan gynnwys meddyg a benodir i roi ail farn (SOAD) ac Adolygwyr Cymheiriaid ar gyfer Nyrsys Practis. Mae'r sefyllfaoedd hyn yn cynnig cyfle unigryw i gyfrannu at y rheoliad a'r gwaith o wella gwasanaethau gofal iechyd ledled Cymru.

📢 Edrychwch ar y swyddi gwag sydd ar gael ar hyn o bryd a gwnewch gais

Rydym wedi curadu nifer fach o adnoddau, yn seiliedig ar feysydd cyffredinol y nodwyd gennym eu bod yn peri pryder yn ystod ein harolygiadau o bractisau meddygon teulu

Dylai practisau barhau i adolygu canllawiau newydd, gofynion proffesiynol, hysbysiadau diogelwch cleifion, ac unrhyw wersi mewnol a gaiff eu dysgu wrth adolygu polisïau, prosesau ac arferion presennol.

Pecyn Cymorth Hunanasesu Arferion Llywodraethu Clinigol (CGPSAT)

Ar gyfer pob un o'r pynciau isod, gan gynnwys Atal a Rheoli Heintiau, rydym yn cynghori practisau i gyfeirio at eu Pecyn Cymorth Hunanasesu Arferion Llywodraethu Clinigol (CGPSAT) er mwyn cael arweiniad pellach. Gall practisau gael gafael ar y CGPSAT yma a'r holl benodau perthnasol yma: CGPSAT – Gofal Sylfaenol Un.

Pecyn brys a safonau Resus UK ar gyfer gofal sylfaenol

• Quality Standards: Primary care equipment and drug lists | Cyngor Adfywio y DU

Canllawiau Llywodraeth y DU ar gymhwysedd y Gwasanaeth Datgelu a Gwahardd (DBS) ar gyfer rolau gofal iechyd. Yn gyffredinol, rydym yn disgwyl i bractisau ddangos bod pob aelod o staff clinigol wedi ymgymryd â gwiriad manylach. Cyfrifoldeb y practisau yw cynnal asesiadau risg a rhoi polisi a rhesymeg glir ar waith pan fo angen adnewyddu'r gwiriadau DBS a phan fydd angen i staff anghlinigol ymgymryd â'r gwiriad, yn seiliedig ar eu rolau a'u cyfrifoldebau (e.e. os ydynt yn ymwneud â chleifion yn uniongyrchol a heb oruchwyliaeth).

• Eligibility for healthcare roles - GOV.UK

Canllawiau Llywodraeth y DU ar imiwneiddio staff, gan gynnwys Hepatitis B:

• Immunisation of healthcare and laboratory staff: the green book, chapter 12 - GOV.UK

Hyfforddiant gorfodol

Rydym yn disgwyl i bractisau nodi gofynion hyfforddiant gorfodol ar gyfer staff clinigol ac anghlinigol, ystyried canllawiau cenedlaethol a phroffesiynol, rolau a chyfrifoldebau unigol, ac anghenion y boblogaeth leol. Mae hyn yn cynnwys rhoi lefel briodol o hyfforddiant ar waith a phennu'r amlder y dylid ei gwblhau. Unwaith y caiff y gofynion hyn eu pennu, dylid rhoi gwybod i staff am yr hyn y disgwylir ganddynt, a dylid rhoi mecanweithiau ar waith i fonitro cydymffurfiaeth a sicrhau eu bod yn cwblhau'r hyfforddiant.

Fel y cam cyntaf, efallai yr hoffai practisau gyfeirio at y canlynol:

• Adnoddau hyfforddiant ar gyfer staff practisau meddygon teulu
• Training statutory and mandatory | Advice guides | Y Coleg Nyrsio Brenhinol
• Home | RCGP Learning

Diogelu

• Diogelu Cymru
• Cwrs: Safeguarding Hub | RCGP Learning
• Child protection and safeguarding | RCPCH

Hebryngwyr

Intimate examinations and chaperones - GMC

Rydym am glywed eich barn! Mae amrywiaeth o arolygon cleifion yn weithredol ar hyn o bryd ar ein gwefan, ac rydym yn croesawu eich barn.

Gellir dod o hyd i'r holl arolygon gweithredol ar ein tudalen arolygon.

Oes gennych chi funud? Hoffem glywed eich barn am ein Bwletin Arsylwi – dim ond ychydig o gwestiynau sydd i'w hateb!