Canmol Diwylliant Cadarnhaol a Gofal Mamolaeth Cynhwysol yn Ysbyty Glangwili, gyda Meysydd i'w Gwella wedi'u nodi

Gwnaeth yr arolygiad tridiau o hyd, a gynhaliwyd ym mis Mai, arolygu sawl ward gan gynnwys y ward cynenedigol a'r ward ôl-enedigol, y ward esgor, yr uned a arweinir gan fydwragedd, yr uned frysbennu a'r uned asesu dydd. Canolbwyntiodd yr arolygwyr ar ansawdd a diogelwch y gofal a ddarperir i'r cleifion.

Ar y cyfan, gwelodd yr arolygwyr ofal caredig a pharchus yn cael ei ddarparu mewn amgylchedd glân a chefnogol. Gwelwyd y staff yn dangos tosturi ac empathi wrth ryngweithio. Hefyd, cafodd y gwasanaeth ei ganmol am ei ffocws cryf ar urddas, preifatrwydd a chynhwysiant, a oedd yn cael eu cefnogi gan wybodaeth iechyd ddwyieithog, gan gynnwys gwybodaeth am gymorth bwydo ar y fron, a phasbort mamolaeth a oedd wedi'i ddylunio ar gyfer unigolion niwroamrywiol. Tynnodd yr arolygwyr sylw at rôl bydwraig profiad y claf fel enghraifft o arfer da, ynghyd â'r gwaith allgymorth ymroddedig i gefnogi cymunedau amrywiol yn well hefyd.

Roedd yr adroddiad yn canmol yr uned famolaeth am greu amgylchedd gwaith a oedd yn ddiogel yn seicolegol, gydag ymgysylltiad cryf â'r staff a diwylliant dysgu a oedd wedi'i sefydlu'n dda. Roedd y cryfderau amlwg yn cynnwys gwaith tîm effeithiol yn ystod adolygiadau o ddigwyddiadau, arferion cadarnhaol mewn sesiynau theatr, a chyflwyno ystafell a llwybr brofedigaeth i gefnogi teuluoedd sydd wedi dioddef profedigaeth. Dywedodd y staff fod yr hyfforddiant ar gydraddoldeb, amrywiaeth a chynhwysiant yn “ystyrlon” ac yn “drawsnewidiol.”

Fodd bynnag, mae'r adroddiad hefyd yn nodi meysydd i'w gwella. Mae'r rhain yn cynnwys atgyfnerthu'r broses o drosglwyddo staff, cydymffurfiaeth well â hyfforddiant gorfodol, a sicrhau bod canllawiau clinigol cyfredol ar gael i'r staff. Croesawodd yr arolygwyr y broses o gyflwyno system frysbennu ffurfiol ar gyfer gofal mamolaeth ond gwnaethant awgrymu y dylid atgyfnerthu'r prosesau archwilio er mwyn cefnogi dysgu a gwelliant parhaus yn well. Gwnaethom hefyd gynghori y dylid adolygu'r defnydd o gyfarwyddiadau llafar ar gyfer meddyginiaethau er mwyn sicrhau arferion diogel a lleihau'r risg o gamgymeriadau. Hefyd, awgrymodd yr arolygwyr y dylid sicrhau bod yr aelodau o staff sy'n siarad Cymraeg yn fwy gweladwy a helpu'r holl staff i deimlo'n fwy hyderus wrth ddefnyddio'r Gymraeg.

Dywedodd Alun Jones, Prif Weithredwr Arolygiaeth Gofal Iechyd Cymru:

Nododd ein harolygiad fod y staff yn Ysbyty Glangwili yn darparu gofal tosturiol a chynhwysol mewn amgylchedd glân a pharchus. Roedd yn galonogol iawn gweld ffocws cryf y gwasanaeth ar urddas, cydraddoldeb a dysgu, yn ogystal â'r diwylliant cadarnhaol a ddisgrifiodd y staff. Er ein bod wedi nodi meysydd i'w gwella i atgyfnerthu diogelwch a chysondeb, gwelsom ddarlun cyffredinol o dîm ymroddedig a oedd yn gweithio'n galed i ddarparu gofal mamolaeth o ansawdd uchel. Byddwn yn parhau i ymgysylltu â Bwrdd Iechyd Prifysgol Hywel Dda er mwyn sicrhau y gwneir cynnydd yn erbyn ein canfyddiadau.

Mai 2025 – Arolygiad Ysbyty - Gwasanaeth Mamolaeth -Ysbyty Cyffredinol Glangwili, Caerfyrddin