Ysbytai

Sut rydym yn arolygu 

Rydym yn arolygu ysbytai'r GIG mewn ffyrdd gwahanol, gan gynnwys y canlynol:

• Arolygiadau o adran neu ward unigol: Adolygiad manwl o un adran neu ward i ddeall ansawdd a diogelwch y gofal a ddarperir.
• Arolygiadau o sawl ward: Cynnal ymweliadau â nifer o wardiau ac adrannau mewn ysbyty i nodi themâu neu faterion ehangach.
• Arolygiadau o sawl ysbyty: Cynnal ymweliadau i asesu sawl ysbyty mewn bwrdd iechyd er mwyn gwerthuso'r trefniadau llywodraethu a'r gwasanaethau a ddarperir. 

Yr hyn rydym yn ei asesu

Yn ystod arolygiadau, rydym yn ystyried sut mae gwasanaethau yn gwneud y canlynol:

• Cydymffurfio â rheoliadau a deddfwriaeth gofal iechyd
• Cyrraedd  Safonau Ansawdd Iechyd a Gofal 2023
• Cydymffurfio â strategaethau, polisïau a deddfwriaeth Llywodraeth Cymru
• Dilyn safonau a chanllawiau proffesiynol sy'n berthnasol i'w maes gofal.

Cynhelir ein harolygiadau o ysbytai'r GIG fel arfer yn ddirybudd er mwyn helpu i gyflawni'r canlynol:

• Cael syniad realistig o'r gweithrediadau o ddydd i ddydd – Mae arolygiadau dirybudd yn rhoi syniad mwy adlewyrchol o'r ffordd y mae gwasanaethau yn gweithredu ar ddiwrnod arferol, heb y cyfle i staff baratoi neu newid arferion. Mae hyn yn helpu AGIC i asesu a yw safonau uchel yn cael eu cynnal yn gyson.
• Mwy o atebolrwydd – Mae gwybod y gall arolygiadau ddigwydd ar unrhyw adeg yn annog ysbytai i gydymffurfio'n barhaus â rheoliadau a safonau, yn hytrach na pharatoi ar gyfer ymweliadau wedi'u trefnu yn unig.
• Gwell diogelwch i gleifion – Drwy arsylwi ar wasanaethau yn eu cyflwr naturiol, mae'n fwy tebygol y bydd arolygwyr yn nodi risgiau gwirioneddol i ddiogelwch cleifion neu ddiffygion yn y gofal y gellid eu methu fel arall yn ystod arolygiad wedi'i gynllunio.
• Mwy o hygrededd ac ymddiriedaeth ymhlith aelodau'r cyhoedd – Mae arolygiadau dirybudd yn dangos bod AGIC yn annibynnol ac yn ddiduedd, gan atgyfnerthu hyder y cyhoedd bod gwasanaethau gofal iechyd yn cael eu dwyn i gyfrif mewn ffordd dryloyw a theg.
• Cyfle i glywed adborth go iawn gan gleifion a staff – Mae cleifion a staff yn fwy tebygol o roi adborth dilys yn ystod ymweliadau dirybudd, gan nad yw'r amgylchedd mor ffurfiol a'i fod yn adlewyrchu eu profiad o ddydd i ddydd yn well.
• Canfod Materion Systemig yn Gynnar – Gall yr arolygiadau hyn helpu i ddod â phroblemau i'r wyneb mewn perthynas â diwylliant yr ysbyty, staffio, neu broblemau arweinyddiaeth na fyddant o bosibl i'w gweld yn ystod arolygiad y paratowyd ar ei gyfer. 

Cynhelir pob arolygiad ysbyty gan dîm sy'n cynnwys o leiaf un o arolygwyr AGIC sy'n arwain ac yn rheoli'r broses, adolygydd cymheiriaid allanol â phrofiad proffesiynol perthnasol, ac adolygydd profiad y claf. Mae'r adolygydd cymheiriaid allanol yn cynnig safbwynt clinigol annibynnol, ac mae'r adolygydd profiad y claf yn ymgysylltu ag unigolion sy'n cael gofal er mwyn casglu gwybodaeth uniongyrchol am eu profiadau. Mae'r dull cydweithredol hwn yn sicrhau bod arolygiadau yn adlewyrchu'r safonau proffesiynol a phrofiadau go iawn cleifion.

Ar ôl yr arolygiad

Yn dilyn arolygiad:

• Byddwn yn cyhoeddi adroddiad arolygu ar ein gwefan
• Gall fod yn ofynnol i wasanaethau wneud gwelliannau a chyflwyno cynllun gwella i ni
• Mae'n bosibl y byddwn yn cymryd camau pellach os caiff pryderon difrifol eu nodi.

Byddwn yn parhau i fonitro gwasanaethau gan ddefnyddio gwybodaeth o arolygiadau a gwybodaeth gan y cyhoedd, a thrwy ymgysylltu â staff gofal iechyd a sefydliadau eraill.

Os hoffech gopi o'n llyfrau gwaith arolygu, cysylltwch ag AGIC.arolygu@llyw.cymru gan nodi pa fath o lyfr gwaith arolygu sydd ei angen arnoch.