Timau Iechyd Meddwl Cymunedol a Thimau Anableddau Dysgu Cymunedol

Rydym yn arolygu Timau Iechyd Meddwl Cymunedol a Thimau Anableddau Dysgu Cymunedol y GIG yng Nghymru er mwyn sicrhau bod pobl yn cael gofal da.

Sut rydym yn arolygu

Rydym yn cynnal yr arolygiadau hyn ar y cyd ag Arolygiaeth Gofal Cymru (AGC), er mwyn sicrhau y ceir trosolwg cynhwysfawr o agweddau iechyd a gofal cymdeithasol ar y gwasanaethau a ddarperir. 

Caiff ein harolygiadau o Dimau Iechyd Meddwl Cymunedol eu harwain gan AGIC, a chaiff arolygiadau o Dimau Anableddau Dysgu Cymunedol eu harwain gan AGC.

 

Yr hyn rydym yn ei ystyried

Yn ystod ein harolygiadau, rydym yn asesu i ba raddau mae Timau Iechyd Meddwl Cymunedol a Thimau Anableddau Dysgu Cymunedol yn gwneud y canlynol:

  • Cyrraedd y Safonau Ansawdd Iechyd a Gofal (2023)
  • Cydymffurfio â deddfwriaeth berthnasol, gan gynnwys:
    • Deddf Iechyd Meddwl 1983
    • Deddf Galluedd Meddyliol 2005
    • Deddf Gwasanaethau Cymdeithasol a Llesiant (Cymru) 2014
  • Darparu gofal diogel ac effeithiol sy'n canolbwyntio ar yr unigolyn
  • Cynnwys defnyddwyr gwasanaethau a gofalwyr wrth gynllunio gofal a gwneud penderfyniadau
  • Sicrhau mynediad amserol at wasanaethau a chymorth argyfwng
  • Cynnal cofnodion gofal a thriniaeth cywir a chynhwysfawr
  • Gweithio mewn ffordd gydweithredol ar draws y sectorau iechyd a gofal cymdeithasol.

 

Sut y caiff arolygiadau eu cynnal

  • Dull ar y cyd: Cynhelir arolygiadau gan dîm sy'n cynnwys:
    • Dau o arolygwyr AGIC
    • Dau adolygydd cymheiriaid clinigol (gan gynnwys adolygydd y Ddeddf Iechyd Meddwl)
    • Dau o arolygwyr AGC.
  • Ymweliadau Lle Rhoddir Rhybudd: Rhoddir hyd at 12 wythnos o rybudd i Dimau Iechyd Meddwl Cymunedol cyn dyddiad yr arolygiad a rhoddir chwe wythnos o rybudd i Dimau Anableddau Dysgu Cymunedol.
  • Casglu Tystiolaeth: Rydym yn adolygu dogfennaeth, yn siarad â staff, defnyddwyr gwasanaethau a gofalwyr ac yn asesu'r amgylchedd ac ansawdd y gofal.

 

Ar ôl yr arolygiad

Yn dilyn arolygiad:

  • Byddwn yn cyhoeddi adroddiad arolygu ar ein gwefan
  • Gall fod yn ofynnol i wasanaethau wneud gwelliannau a chyflwyno cynllun gwella i ni
  • Mae'n bosibl y byddwn yn cymryd camau pellach os caiff pryderon difrifol eu nodi
  • Byddwn yn parhau i fonitro gwasanaethau gan ddefnyddio gwybodaeth o arolygiadau a gwybodaeth gan y cyhoedd, a thrwy ymgysylltu â staff gofal iechyd a sefydliadau eraill.

Os hoffech gopi o'n llyfr gwaith arolygu, cysylltwch ag AGIC.arolygu@llyw.cymru gan nodi pa fath o lyfr gwaith arolygu sydd ei angen arnoch.