Arweinydd Prosiect - Datblygu Methodoleg Mamolaeth a Newyddenedigol

Arolygiaeth Gofal Iechyd Cymru (AGIC) yw rheoleiddiwr annibynnol gofal iechyd yng Nghymru. Rydym yn arolygu gwasanaethau'r GIG ac yn rheoleiddio darparwyr gofal iechyd annibynnol i sicrhau eu bod yn cydymffurfio â'r safonau, y polisïau, y canllawiau a'r rheoliadau gofynnol. Ein nod yw ysgogi gwelliant a diogelu ansawdd gofal.

Rydym yn cynnig cyfle am secondiad cyffrous i arweinydd prosiect dynamig a phrofiadol - er mwyn rheoli'r broses o ddylunio a gweithredu methodoleg arolygu a rhoi sicrwydd newydd ar gyfer gwasanaethau mamolaeth a newyddenedigol yng Nghymru.

Y Rôl

Bydd y prosiect hwn ar waith am gyfnod penodol, er mwyn datblygu dull arolygu penodedig ar gyfer gwasanaethau mamolaeth a newyddenedigol. Mae'r gwaith yn ystyried y cylch arolygu cyfan o gynllunio'r gwaith maes, datblygu llinellau ymholi allweddol, llyfrau gwaith i gofnodi tystiolaeth ac adrodd ar y canfyddiadau.

Nid proses o ddiweddaru neu ddiwygio adnoddau methodoleg presennol AGIC yw'r broses hon, ond proses o ailddylunio o'r bôn i'r brig, wedi'i llywio gan bolisi cenedlaethol, safonau clinigol, risgiau i ddiogelwch cleifion a chan ystyried profiadau menywod, rhieni a'u teuluoedd. Bydd hefyd yn ystyried canfyddiadau ac argymhellion yr Asesiad Sicrwydd Mamolaeth a Newyddenedigol Cenedlaethol cyfredol.

Bydd y secondiad yn darparu gallu penodedig o fewn swyddogaeth brysur i arwain y prosiect pwysig hwn. Bydd y gwaith yn arwain y ffordd o ran creu model posibl ar gyfer arolygu gwasanaethau'r GIG yn y dyfodol.

Bydd deiliad y swydd yn adrodd i'r Pennaeth Partneriaethau, Gwybodaeth a Methodoleg a bydd yn atebol i Fwrdd Prosiect sy'n cynnwys uwch-aelodau o staff AGIC, gan gynnwys y Cyfarwyddwr Sicrwydd, Pennaeth Sicrwydd y GIG a chynrychiolwyr o'r tîm Methodoleg a'r tîm Clinigol.  Y Cyfarwyddwr Strategaeth ac Ymgysylltu yw Noddwr y Prosiect.

Mae gwasanaethau mamolaeth a newyddenedigol ymhlith y meysydd gofal iechyd mwyaf cymhleth a risg uchel. Mae'r rôl hon yn cynnig cyfle unigryw i lywio'r ffordd y mae AGIC yn arolygu'r gwasanaethau hyn ac yn rhoi sicrwydd yn eu cylch.

Cyfrifoldebau Allweddol

• Arwain y broses o ddatblygu methodoleg arolygu newydd ar gyfer gwasanaethau mamolaeth a newyddenedigol – gan lywio dull gweithredu AGIC mewn perthynas â rhoi sicrwydd ynghylch y meysydd clinigol cymhleth hyn.
• Rhoi dull rheoli prosiect effeithiol ar waith er mwyn sicrhau y caiff y fethodoleg ei chyflwyno o fewn y terfynau amser y cytunwyd arnynt.
• Llunio panel cynghori ar gyfer y gwaith, a fydd yn debygol o gynnwys uwch-glinigwyr o wasanaethau mamolaeth a gwasanaethau newyddenedigol.
• Triongli gwybodaeth a chyngor gan rwydweithiau clinigol, Llywodraeth Cymru, adolygwyr cymheiriaid clinigol, a rhanddeiliaid eraill er mwyn llywio'r broses ddylunio.
• Sicrhau bod y fethodoleg yn seiliedig ar dystiolaeth ac yn gyson â'r Colegau Brenhinol, polisi cenedlaethol, safonau clinigol a chanllawiau proffesiynol.
• Cydweithio'n agos ag adolygwyr cymheiriaid clinigol i lywio'r broses o ddatblygu'r fethodoleg.

Meini Prawf Hanfodol 

• Profiad o lywodraethu clinigol, yn enwedig ym maes mamolaeth, newyddenedigol neu feysydd cysylltiedig.
• Dealltwriaeth gryf o lwybrau gofal mamolaeth a newyddenedigol, gan gynnwys y cymhlethdodau a'r risgiau cysylltiedig.
• Ymwybyddiaeth o bolisïau gofal iechyd perthnasol yng Nghymru, fel y Datganiad Ansawdd Cenedlaethol ar gyfer Gwasanaethau Mamolaeth a Newyddenedigol.
• Gallu amlwg i ymgysylltu a chyfathrebu'n effeithiol ag amrywiaeth eang o randdeiliaid, gan gynnwys gweithwyr clinigol proffesiynol, arweinwyr polisi a thimau mewnol.
• Profiad o ddatblygu neu gymhwyso methodolegau sicrwydd mewn lleoliad gofal iechyd neu leoliad rheoleiddio.
• Sgiliau arsylwi, asesu a dadansoddi ardderchog, gyda'r gallu i ddehongli gwybodaeth gymhleth a'i throsi i greu adnoddau arolygu ymarferol.

Meini Prawf Dymunol 

• Profiad amlwg o reoli prosiectau, gan gynnwys cynllunio, cyflawni a rheoli risg mewn cyd-destun gofal iechyd neu sector cyhoeddus. 

Cyfle i chwarae rôl allweddol wrth ddatblygu dull sicrwydd AGIC ar gyfer gwasanaethau mamolaeth a newyddenedigol yng Nghymru. Bydd yn darparu profiad o ymgysylltu ag amrywiaeth o dimau ym mhob rhan o AGIC, gyda ffocws ar y gangen Partneriaethau, Gwybodaeth a Methodoleg. 

Mae sgiliau Cymraeg yn ddymunol ar gyfer y rôl hon. 

Bydd y swydd hon yn destun gwiriad datgeliad manylach y Gwasanaeth Datgelu a Gwahardd (DBS). 

Efallai y bydd angen teithio ledled Cymru 

I gael rhagor o wybodaeth am y swydd, cysylltwch â Richard Hayward - richard.hayward@llyw.cymru

Os ydych yn awyddus i wella gwasanaethau mamolaeth a newyddenedigol, byddem yn eich annog i wneud cais ar gyfer y cyfle unigryw hwn i gael effaith sylweddol yng Nghymru. Dylech gyflwyno eich datganiad o ddiddordeb yn nodi sut rydych yn bodloni'r meini prawf penodol i'r swydd drwy e-bost i richard.hayward@llyw.cymru (Pennaeth Partneriaethau, Gwybodaeth a Methodoleg) erbyn dydd Llun 8 Rhagfyr 2025.