Arolygiaeth Gofal Iechyd Cymru yn dynodi'r Adran Achosion Brys yn Ysbyty Glan Clwyd yn Wasanaeth sydd Angen ei Wella'n Sylweddol

Gwnaed y dynodiad hwn yn unol â phroses Gwasanaeth sy'n Peri Pryder AGIC ac mae'n adlewyrchu'r pryderon a nodwyd yn ystod yr arolygiad mewn perthynas ag arweinyddiaeth, llywodraethu a rheoli risg yn yr Adran Achosion Brys yn Ysbyty Glan Clwyd. Mae angen gwneud gwelliannau i gefnogi gofal sydd bob amser yn ddiogel ac yn cael ei reoli'n dda, wedi'i ategu gan brosesau arwain a goruchwylio effeithiol, ac mae'n dangos bod AGIC yn disgwyl gwelliant clir a brys, wedi'i gefnogi gan drefniadau goruchwylio cryfach, gyda phrosesau monitro a chamau dilynol gwell i olrhain cynnydd. 

Er bod AGIC yn cydnabod y galw sylweddol sydd ar wasanaethau gofal brys a gofal mewn argyfwng, mae'r penderfyniad hwn yn seiliedig ar b'un a yw systemau, atebolrwydd a phrosesau goruchwylio yn ddigon cadarn i reoli'r pwysau hynny yn ddiogel a lleihau'r risg o amrywiaeth o ran gofal.

Roedd yr adran yn destun trefniadau Gwasanaeth sydd Angen ei Wella'n Sylweddol yn flaenorol rhwng mis Mai 2022 a mis Awst 2024. Mae'r dynodiad diweddaraf hwn yn dangos nad yw'r gwelliannau a wnaed yn ystod y cyfnod hwnnw wedi cael eu cynnal.

Ers yr arolygiad, mae AGIC wedi ymgysylltu'n agos â Bwrdd Iechyd Prifysgol Betsi Cadwaladr a bydd yn parhau i fonitro cynnydd drwy ei phroses Gwasanaeth sy'n Peri Pryder. Mae hyn yn cynnwys gweithgarwch ymgysylltu strwythuredig, camau gweithredu y cytunwyd arnynt a gweithgarwch sicrwydd parhaus nes y bydd AGIC yn fodlon bod y gwelliannau angenrheidiol wedi cael eu gwneud.

Rôl AGIC yw nodi pryderon a sicrhau bod gwasanaethau yn cymryd y camau sydd eu hangen i wella a darparu gofal diogel. Dylai cleifion y mae angen gofal brys neu ofal mewn argyfwng arnynt barhau i ddefnyddio'r adran. 

Caiff yr adroddiad arolygu llawn, sy'n nodi canfyddiadau manwl, ei gyhoeddi ym mis Medi 2026.

Dywedodd Alun Jones, Prif Weithredwr Arolygiaeth Gofal Iechyd Cymru:

“Rydym wedi dynodi'r Adran Achosion Brys yn Ysbyty Glan Clwyd yn Wasanaeth sydd Angen ei Wella'n Sylweddol yn dilyn pryderon ynghylch arweinyddiaeth, llywodraethu a rheoli risg.

Mae'r dynodiad hwn yn golygu ein bod yn disgwyl gwelliant clir a brys, wedi'i gefnogi gan drefniadau goruchwylio ac atebolrwydd cryfach.

Er ein bod yn cydnabod y pwysau y mae adrannau achosion brys yn eu hwynebu, mae'n rhaid i wasanaethau roi trefniadau effeithiol ar waith i reoli'r pwysau hynny yn ddiogel. Byddwn yn parhau i fonitro cynnydd yn agos a byddwn yn adrodd ar ein canfyddiadau llawn ym mis Medi.”