AGIC yn isgyfeirio Gwasanaethau Fasgwlaidd yng Ngogledd Cymru fel gwasanaeth sydd angen ei wella'n sylweddol
Heddiw, cyhoeddwyd adroddiad gan Arolygiaeth Gofal Iechyd Cymru (AGIC) mewn perthynas â'r gwasanaethau fasgwlaidd a ddarperir gan Fwrdd Iechyd Prifysgol Betsi Cadwaladr.
Mae'r adroddiad yn dilyn y broses o isgyfeirio'r gwasanaethau hyn fel Gwasanaeth sydd Angen ei Wella'n Sylweddol (SRSI). Nod proses SRSI AGIC yw nodi methiannau o fewn gwasanaethau, er mwyn ysgogi gwelliannau brys. Nododd yr adolygiad dystiolaeth o gynnydd mewn perthynas â diogelwch cleifion ac ansawdd y gofal a ddarperir a arweiniodd at y broses o isgyfeirio.
Gwnaed y penderfyniad i gynnal yr adolygiad yn dilyn cyhoeddi Adroddiad Coleg Brenhinol y Llawfeddygon yn Lloegr yn 2022, a oedd yn nodi nifer o argymhellion brys mewn perthynas â risgiau i ddiogelwch cleifion. Roedd ein hadolygiad yn cydnabod bod cynnydd boddhaol wedi'i wneud yn erbyn pob un o'r naw argymhelliad a wnaed gan Goleg Brenhinol y Llawfeddygon. Mae'n amlwg bod y bwrdd iechyd wedi gwneud ymdrechion i roi prosesau ar waith a gwneud gwelliannau yn ei wasanaethau fasgwlaidd, gyda'r nod o roi gofal diogel, amserol ac effeithiol i gleifion. Er bod y broses hon o isgyfeirio yn gam cadarnhaol, mae angen i'r bwrdd iechyd gynnal y momentwm y mae wedi'i greu er mwyn parhau i wella'r gwasanaeth.
Ym mis Ebrill 2019, newidiodd y bwrdd iechyd ei fodel gofal ar gyfer gwasanaethau fasgwlaidd, lle roedd y llawdriniaethau mwyaf cymhleth, megis llawdriniaeth rhwydwelïol fawr, yn cael eu cynnal mewn canolfan arbenigol yn Ysbyty Glan Clwyd. Y nod yw sicrhau bod cleifion yn ardal y bwrdd iechyd yn cael yr un mynediad at wasanaethau fasgwlaidd, ni waeth ble maent yn byw, a bod llawdriniaethau yn cael eu blaenoriaethu i'r rhai sydd eu hangen fwyaf.
Yn ystod ein hadolygiad, gwnaethom ystyried a wnaeth y camau gweithredu a roddwyd ar waith gan y bwrdd iechyd fynd i'r afael â'r argymhellion a wnaed gan Goleg Brenhinol y Llawfeddygon a gwella ansawdd y gofal a ddarperir. Gwnaethom hefyd ystyried a oedd y gofal fasgwlaidd yn gyson.
Gwnaed cynnydd boddhaol yn erbyn naw argymhelliad a amlinellwyd gan dîm adolygu Coleg Brenhinol y Llawfeddygon yn 2022, a bod camau gweithredu brys wedi'u cymryd i fynd i'r afael â'r pum argymhelliad brys o ran risgiau i ddiogelwch cleifion. Mae angen gwneud rhagor o waith i gryfhau rhai agweddau ar gadw cofnodion clinigol, a sicrhau bod taith claf drwy'r llwybrau fasgwlaidd yn gyson ac yn gadarn. Rhaid i'r bwrdd iechyd sicrhau bod ansawdd prosesau cyfathrebu ysgrifenedig yn cael ei gynnal, a bod cofnodion yn cael eu ffeilio'n amserol ac mewn trefn gronolegol, er mwyn sicrhau diogelwch cleifion bob amser. Cafodd Panel Adolygu Ansawdd Fasgwlaidd ei sefydlu gan y bwrdd iechyd i gynnal gwaith craffu pellach ar gofnodion y cleifion a chaiff ei adolygu gan Goleg Brenhinol y Llawfeddygon. O ganlyniad, mae gwybodaeth newydd wedi'i nodi ac mae'r bwrdd iechyd wedi atgyfeirio pedwar unigolyn at y crwner.
Drwy ein hadolygiad, gwelsom fod y bwrdd iechyd wedi gwneud cynnydd boddhaol o ran y gwelliannau a argymhellwyd ar gyfer proses y Tîm Amlddisgyblaethol o wneud penderfyniadau. Grŵp o weithwyr gofal iechyd proffesiynol o arbenigeddau amrywiol yw tîm amlddisgyblaethol, megis llawfeddygon, anesthetyddion, nyrsys neu ffisiotherapyddion, sy'n cydweithio i wneud penderfyniadau ar y driniaeth a'r gofal a ddarperir i gleifion. Nododd arolygwyr bod camau gweithredu brys wedi'u rhoi ar waith yn y gwasanaeth llawdriniaeth fasgwlaidd, a oedd yn cynnwys trefniadau cyflenwi ychwanegol a chymorth agosach i'r tîm amlddisgyblaethol wrth wneud penderfyniadau. Er bod gwelliannau sylweddol wedi cael eu gwneud, mae angen i'r bwrdd iechyd wneud rhagor o waith er mwyn sicrhau bod trafodaethau'r tîm amlddisgyblaethol bob amser yn cael eu dogfennu'n ddi-oed mewn cofnodion clinigol.
Tynnodd ein hadolygiad sylw at bryderon ynglŷn â'r diwylliant gwaith rhwng rhai timau a oedd yn ymwneud â llwybrau gofal gwahanol wasanaethau fasgwlaidd y bwrdd iechyd, a all effeithio ar ofal cleifion. Roedd hyn yn amlwg drwy ein cyfweliadau â'r staff, a awgrymodd fod y prosesau cyfathrebu yn wael. Mae'n rhaid meithrin cydberthnasau gwaith cliriach, er mwyn sicrhau bod cleifion yn cael eu hatgyfeirio'n ddi-oed, a bod cleifion yn cael eu hasesu gan y tîm mwyaf addas, er mwyn rhoi cyngor a gofal mwy amserol.
Gwelsom fod cynnydd boddhaol hefyd wedi cael ei wneud gan y bwrdd iechyd o ran y broses o gael cydsyniad yn y gwasanaethau fasgwlaidd. Gwelsom dystiolaeth o welliannau drwy ganlyniadau archwilio ar y broses gydsynio a thrwy ein hadolygiad o gofnodion clinigol. Fodd bynnag, mae angen gwneud rhagor o waith er mwyn sicrhau bod cofnodion bob amser yn dangos y broses gydsynio gyfan mewn ffordd gywir a phriodol.
Pan aethom ati i ystyried a oedd y trefniadau llywodraethu a oedd ar waith yn y bwrdd iechyd yn effeithiol o ran monitro'r ymateb i ganfyddiadau ac argymhellion Coleg Brenhinol y Llawfeddygon yn 2022, gwelsom fod y rhain yn foddhaol.
Dywedodd Prif Weithredwr Arolygiaeth Gofal Iechyd Cymru, Alun Jones:
Mae'n gadarnhaol clywed bod y gwasanaethau fasgwlaidd yn gwella mewn nifer o feysydd. Fodd bynnag, gwnaed 11 o argymhellion ar gyfer gwelliannau pellach yn ein hadolygiad er mwyn cryfhau'r trefniadau presennol sydd ar waith. Mae'n rhaid i'r bwrdd iechyd sicrhau bod mesurau ar waith i gael sicrwydd bod y gwelliannau a'r prosesau a gyflwynwyd ers adolygiad Coleg Brenhinol y Llawfeddygon yn gynaliadwy yn awr ac yn y dyfodol. Mae'n rhaid i'r bwrdd iechyd ystyried ein hargymhellion, ac rydym yn disgwyl iddynt gael eu rhoi ar waith yng nghyd-destun gwaith gwella ehangach.