Mae angen gwella uned iechyd meddwl arbenigol yn Ysbyty'r Tri Chwm ar unwaith
Mae Arolygiaeth Gofal Iechyd Cymru (AGIC) wedi cyhoeddi adroddiad (10 Tachwedd 2023) yn dilyn arolygiad dirybudd o uned iechyd meddwl arbenigol yng Nglynebwy.
Yn ystod yr arolygiad, nodwyd nifer o faterion yn ymwneud â threfniadau llywodraethu, diogelwch cleifion a phreifatrwydd ac urddas yr oedd angen i'r bwrdd iechyd fynd i'r afael â nhw ar unwaith. Roedd yn siomedig nodi hefyd nad oedd rhai o'r materion wedi'u datrys yn dilyn arolygiad blaenorol yn 2018.
Cafodd yr arolygiad o Ward Cedar Parc yn Ysbyty'r Tri Chwm ei gynnal dros dri diwrnod yn olynol ym mis Awst 2023. Mae'r ysbyty, a gaiff ei redeg gan Fwrdd Iechyd Prifysgol Aneurin Bevan, yn darparu gwasanaethau iechyd meddwl i bobl dros 65 oed. Roedd ein harolygiad yn canolbwyntio ar Ward Cedar Parc, sy'n cynnwys 14 o welyau ac yn darparu asesiadau a thriniaethau arbenigol i gleifion sydd â dementia.
Ni chafodd yr arolygwyr sicrwydd bod iechyd, diogelwch a llesiant y cleifion, y staff a'r ymwelwyr yn cael eu hyrwyddo a'u hamddiffyn. Yn ogystal, nid oedd risgiau posibl o niwed yn cael eu nodi, eu monitro na, lle bo hynny'n bosibl, eu lleihau neu'u hatal. Roedd angen i'r bwrdd iechyd weithredu ar unwaith i fynd i'r afael â nifer o faterion, er enghraifft, gwelodd yr arolygwyr bod canllawiau ar goll o goridorau'r ward ac ymylon miniog amlwg a oedd yn peri risg o anaf. Gwelodd yr arolygwyr hefyd bod y clychau galw yn ystafelloedd gwely'r cleifion wedi'u lleoli ar draws yr ystafell o welyau'r cleifion ac roedd eraill wedi'u lleoli lle na allai'r cleifion eu cyrraedd wrth orwedd yn eu gwelyau. Cawsom ddata ar atal yn gorfforol a oedd yn nodi bod staff nad oeddent yn cydymffurfio neu nad oeddent wedi cwblhau'r hyfforddiant perthnasol wedi atal pedwar claf yn gorfforol dros y tri mis diwethaf. At hynny, nid oedd polisi ‘Defnyddio Ymyriadau Corfforol Cyfyngol’ y bwrdd iechyd yn gyfredol ers 2019. Gwnaethom hefyd nodi diffyg cyfathrebu cyffredinol rhwng uwch-aelodau o'r staff ac ni chawsom sicrwydd bod systemau a threfniadau llywodraethu'r ysbyty yn cefnogi gwelliannau parhaus nac yn cynnig cyfleoedd i rannu'r gwersi a gaiff eu dysgu o ddigwyddiadau difrifol.
Yn gyffredinol, roedd y staff yn trin y cleifion â pharch, a chadarnhaodd y cleifion hynny a gwblhaodd ein holiadur fod y staff yn gwrtais, yn gefnogol ac yn barod i helpu. Gwelwyd fod y staff nyrsio yn wybodus am anghenion unigol y cleifion ac roedd cydberthnasau proffesiynol da wedi cael eu meithrin i gefnogi iechyd a llesiant y cleifion. Gwelodd yr arolygwyr y staff yn defnyddio syniadau a dulliau arloesol i ymgysylltu â chleifion, a nodwyd fod hyn yn arfer da.
Gwelodd yr arolygwyr fod cofnodion y cleifion yn dangos tystiolaeth o asesiadau corfforol a gwaith monitro manwl a phriodol. Roedd y Cynlluniau Gofal a Thriniaeth wedi'u teilwra i'r unigolyn, yn canolbwyntio ar yr unigolyn ac yn adlewyrchu anghenion a risgiau'r cleifion yn yr ysbyty. Fodd bynnag, nodwyd nifer o faterion a oedd yn effeithio ar breifatrwydd ac urddas y cleifion. Roedd y materion yn cynnwys cyfleusterau golchi dwylo annigonol ar y ward a diffyg toiledau ar wahân dynodedig. Roedd y paneli gweld a orchuddiwyd ar ddrysau ystafelloedd gwely cleifion yn atal y staff rhag cynnal arsylwadau therapiwtig ar gleifion heb agor y drws a tharfu arnynt. Gwelodd yr arolygwyr hefyd fod y cleifion yn cael gofal personol yn eu hystafelloedd gwely gyda'r drysau wedi'u gadael ar agor, a oedd yn peryglu eu preifatrwydd. Yn ystod ein harolygiad blaenorol o'r ward yn 2018, nodwyd gennym nifer o feysydd a oedd yn peryglu preifatrwydd ac urddas y cleifion ac roedd yn siomedig gweld materion tebyg o hyd.
Roedd yn gadarnhaol gweld nad oedd unrhyw swyddi gwag parhaol i staff ac ar adeg ein harolygiad, gwelodd yr arolygwyr fod y lefelau staffio yn briodol er mwyn cynnal diogelwch y cleifion. Fodd bynnag, roedd rhai aelodau o'r staff o'r farn nad oedd digon o staff i ddiwallu anghenion newidiol y staff a'r cynnydd yn y galw gan gleifion ar y ward. Cadarnhaodd y staff fod strwythur llywodraethu ar waith o ran gweithgareddau a chyfarfodydd i drafod digwyddiadau, canfyddiadau a materion yn ymwneud â gofal cleifion. Fodd bynnag, ni chawsom sicrwydd bod y strwythur llywodraethu yn darparu cymorth gweithredol cryf, arweinyddiaeth glir ac atebolrwydd i staff y ward.
Dywedodd Prif Weithredwr Arolygiaeth Gofal Iechyd Cymru, Alun Jones:
“Mae'n gadarnhaol nodi ymroddiad y staff i ddarparu gofal sy'n canolbwyntio ar yr unigolyn yn Ysbyty'r Tri Chwm. Nododd ein harolygiad feysydd i'w gwella ar unwaith ac mae'n rhaid i Fwrdd Iechyd Prifysgol Aneurin Bevan gynnal mesurau cadarn i sicrhau diogelwch y cleifion ac atgyfnerthu'r systemau arwain a rheoli yn yr ysbyty. Byddwn yn parhau i ymgysylltu â'r bwrdd iechyd ar ei gynlluniau ar gyfer gwella.”