Pa mor effeithiol y caiff gwasanaethau ECT eu harwain, eu llywodraethu a'u cyflwyno ledled Cymru i ddarparu gofal diogel, cyson, sy'n canolbwyntio ar yr unigolyn?

Nod yr adolygiad yw ystyried pa mor effeithiol y caiff gwasanaethau ECT eu harwain, eu llywodraethu a'u cyflwyno ledled Cymru i ddarparu gofal diogel, cyson, sy'n canolbwyntio ar yr unigolyn. 

Bydd yr adolygiad yn ceisio ateb y cwestiynau canlynol:

• Pa mor effeithiol yw'r trefniadau arweinyddiaeth a llywodraethu ar gyfer gwasanaethau ECT?
• Sut caiff cydsyniad, galluedd, mesurau diogelu cyfreithiol a hawliau cleifion eu cefnogi o fewn gwasanaethau ECT? 
• Sut mae gwasanaethau ECT yn sicrhau bod ganddynt ddigon o gapasiti yn y gweithlu a gweithlu sydd wedi'i hyfforddi'n briodol, sy'n gymwys ac yn cael ei gefnogi? 
• Beth yw profiad pobl sy'n derbyn ECT, a sut y cânt eu cynnwys yn eu gofal a'u triniaeth?
• Sut mae gwasanaethau ECT yn defnyddio tystiolaeth i fonitro ansawdd a chefnogi gwelliant?

Bydd yr adolygiad hefyd yn ystyried cysondeb wrth ddarparu gwasanaethau ledled Cymru drwy'r llinellau ymholi allweddol, yn nodi enghreifftiau o arfer canmoladwy, ac yn archwilio cyfleoedd i gefnogi gwelliant a dysgu ar y cyd ar draws y GIG yng Nghymru. 

Y tu hwnt i'r cwmpas

Ni fydd yr adolygiad yn gwneud y canlynol:

• Ymchwilio i gwynion unigol na gwneud penderfyniad arnynt
• Ymchwilio i ymarferwyr unigol nac ailgyflawni swyddogaethau rheoli lleol.
• Darparu neu ddisodli system achredu ffurfiol ECTAS 
• Llunio barn ynghylch a ddylai unigolyn penodol fod wedi derbyn ECT ai peidio
• Gellir adolygu sampl o gofnodion cleifion i asesu ansawdd a chysondeb prosesau asesu, cydsyniad, triniaeth, prosesau monitro a dogfennaeth ddilynol. Bydd hyn yn llywio canfyddiadau thematig ac ni fydd yn gyfystyr ag ymchwiliad ôl-weithredol i benderfyniadau clinigol unigol. 

Methodoleg

Er mwyn ateb cwestiynau'r adolygiad, bydd AGIC yn casglu ac yn triongli tystiolaeth o amrywiaeth o ffynonellau. Bydd y fethodoleg yn gymesur, yn cael ei defnyddio'n gyson ar draws byrddau iechyd ac yn ddigon hyblyg i archwilio risgiau lleol, meysydd sy'n peri pryder ac arferion canmoladwy. 

• Adolygu deddfwriaeth berthnasol, safonau cenedlaethol, canllawiau clinigol a safonau proffesiynol
• Adolygu gwybodaeth bresennol AGIC a chanfyddiadau perthnasol o arolygiadau blaenorol 
• Ystyried y data cenedlaethol a lleol sydd ar gael, gan gynnwys gweithgarwch, canlyniadau, digwyddiadau, risgiau, cwynion, adborth gan gleifion a chanfyddiadau archwiliadau
• Gofyn am wybodaeth am lywodraethu, y gweithlu, trefniadau clinigol, cydymffurfiaeth gyfreithiol, hawliau cleifion, canlyniadau a gwelliannau gan fyrddau iechyd ac adolygu'r wybodaeth honno. 
• Defnyddio'r adolygiad o ddogfennau i ddatblygu llinellau ymholi penodol ar gyfer y gwaith maes. 

• Ymweld â safleoedd ECT GIG Cymru gan ddefnyddio fframwaith casglu tystiolaeth cyson
• Arsylwi ar  gyfleusterau, trefniadau preifatrwydd ac urddas, cyfarpar, prosesau rheoli meddyginiaethau a pharodrwydd ar gyfer argyfyngau
• Ystyried sut mae'r amgylchedd yn cefnogi triniaeth ac adferiad diogel, sy'n canolbwyntio ar yr unigolyn. 

• Bydd AGIC yn cynnal cyfweliadau, grwpiau ffocws neu ffyrdd eraill o ymgysylltu, fel y bo'n briodol, gyda'r canlynol: 
  • Arweinwyr gweithredol
  • Cyfarwyddwyr clinigol a rheolwyr gwasanaeth
  • Seiciatryddion ymgynghorol ac anesthetyddion ymgynghorol arweiniol
  • Staff nyrsio, staff adfer a staff clinigol perthnasol eraill

• Adolygu sampl gymesur o gofnodion yn erbyn y meini prawf y cytunwyd arnynt
• Ystyried prosesau asesu, prosesau darparu gwybodaeth, cydsyniad neu awdurdodiad statudol, cynllunio triniaethau, monitro iechyd corfforol, rhoi triniaethau, prosesau adfer, canlyniadau a chamau dilynol 
• Defnyddio canfyddiadau thematig dienw i nodi cysondeb, risgiau, cryfderau a chyfleoedd i wella. 

• Casglu ac ystyried profiadau a safbwyntiau pobl sydd wedi cael ECT, a lle y bo'n briodol, ystyried profiadau a safbwyntiau eu teuluoedd, gofalwyr ac eiriolwyr.
• Defnyddio dulliau hygyrch a chynhwysol o ymgysylltu er mwyn cael cymaint o gyfranogiad â phosibl a lleihau rhwystrau i gymryd rhan. 
• Ystyried y dulliau ymgysylltu, fel sgyrsiau un-i-un, lle mae'r rhain yn cynnig cipolwg priodol ac ystyrlon ar brofiadau pobl o ofal a thriniaeth.  Gall hyn gynnwys gofalwyr ac aelodau o'r teulu.
• Ystyried pa mor effeithiol y mae gwasanaethau yn helpu pobl i ddeall eu hopsiynau triniaeth, i arfer eu hawliau ac i gymryd rhan mewn penderfyniadau am eu gofal. 
• Archwilio sut mae gwasanaethau yn cael adborth gan gleifion a gofalwyr, yn ei ddadansoddi ac yn gweithredu arno er mwyn cefnogi gwelliant parhaus.

Nod AGIC yw cydweithio â rhanddeiliaid perthnasol drwy gydol yr adolygiad. Bydd hyn yn cynnwys ymgysylltu â byrddau iechyd GIG Cymru, rhwydweithiau clinigol a phroffesiynol, cynghorwyr arbenigol, cynrychiolwyr cleifion a gofalwyr, sefydliadau eirioli, a sefydliadau eraill sydd ag arbenigedd neu wybodaeth berthnasol.

Bydd rhanddeiliaid yn cymryd rhan ar gamau allweddol i lywio'r fethodoleg, helpu i ymgysylltu'n briodol â chleifion, nodi cyfleoedd i gydweithio, lleihau achosion diangen o ddyblygu a phrofi themâu sy'n dod i'r amlwg. Bydd adolygwyr cymheiriaid clinigol arbenigol yn helpu i gynnal yr adolygiad ac i sicrhau ansawdd y broses. 

Bydd gwaith cynllunio a chwmpasu yn cael ei gynnal yn ystod mis Medi a mis Hydref 2026, gyda'r cyfnod casglu tystiolaeth ffurfiol yn dechrau ym mis Tachwedd 2026. Mae'r amserlen arfaethedig fel a ganlyn:

Daw'r adolygiad i ben drwy gyhoeddi adroddiad cenedlaethol. Bydd yr adroddiad yn nodi'r dystiolaeth a ystyriwyd, themâu cenedlaethol, amrywiadau o ran y gwasanaethau a ddarperir, meysydd o arfer da neu ganmoladwy ac argymhellion lle mae angen gwneud gwelliannau. Bydd llwybr tystiolaeth a phroses sicrhau ansawdd glir yn cefnogi'r canfyddiadau. 

Os nodir pryderon brys yn ystod yr adolygiad, bydd AGIC yn eu trafod ar unwaith gyda'r darparwr gofal iechyd perthnasol a, lle y bo'n briodol, Llywodraeth Cymru neu sefydliad perthnasol arall, fel ECTAS. Gall AGIC hefyd rannu gwersi interim neu themâu sy'n dod i'r amlwg lle byddai hyn yn helpu i wneud gwelliannau amserol. 

Caiff tudalen we benodedig ei datblygu ar gyfer yr adolygiad ar wefan AGIC. Bydd AGIC yn defnyddio sianeli cyfathrebu ac ymgysylltu priodol i esbonio'r adolygiad a sut y gall pobl gyfrannu ato. Ar ôl cyhoeddi'r adroddiad, bydd AGIC yn ystyried gweithgareddau dilynol, digwyddiadau dysgu a chyfleoedd eraill i gefnogi gwelliannau a chyfleoedd dysgu ar y cyd ar draws GIG Cymru. 

Mae'r adolygiad hwn yn rhan o waith AGIC i roi sicrwydd annibynnol ar ansawdd a diogelwch gwasanaethau gofal iechyd yng Nghymru. Mae Deddf Iechyd a Gofal Cymdeithasol (Iechyd Cymunedol a Safonau) 2003 (Rhan II, Pennod 4) yn rhoi pwerau i AGIC gynnal arolygiadau, adolygiadau ac ymchwiliadau mewn perthynas â'r GIG a gwasanaethau a ddarperir ar ran y GIG.

Pan fydd AGIC yn prosesu data personol, bydd hyn yn unol â deddfwriaeth diogelu data gymwys, gan gynnwys Deddf Diogelu Data 2018 a Rheoliad Cyffredinol y DU ar Ddiogelu Data. Mae rhagor o wybodaeth ar gael ym mholisi preifatrwydd AGIC ar ei gwefan.